Terje Aamodt
Prosjektleiar for dei kommunale prosjekta i Bypakke Ålesund, Jøran Mentzoni Eilertsen, seier eit framtidsretta kollektivtilbod er eit av måla for bypakken og for å få til det, så må ein jobbe langs fleire spor.
- Bussane må gå ofte nok (drift).
- Bussane må gå raskt nok (infrastruktur).
- Det må vere enkelt å lett å bruke bussane (kommunikasjon).
Jøran Mentzoni Eilertsen seier Bypakketiltaka skal korte ned reisetida for passasjerane, gjennom ei rekke små og store tiltak slik som snarvegar, kollektivfelt, prioritering i kryss og nye haldeplassar. Samtidig jobbar Fram med utvikling av rutetilbodet, blant anne med hyppigare avgangar og enklare linjenummerering.
- Til saman vil desse grepa i bypakken gi eit stadig betre kollektivtilbod for innbyggarane, fortel Eilertsen.
Kortast og fortast
Reisetid er viktig for at kollektivtrafikken skal kunne konkurrere mot privatbil. Difor bør bussen unngå omvegar og "tidstjuvar". Kort reisetid og direkte linjeføring gjer bussen konkurransedyktig.
Bussreisa tar gjerne lengre tid enn bil på grunn av ventetid og gangtid til haldeplass, men ein tommelfingerregel seier at om bussen dør til dør tar 1,5 gonger tida med bil, så konkurrer bussen godt mot bil. Blir reisetida med buss det dobbelte av tida det tar med bil, så taper bussen konkurransen.
Skal vi ha kort reisetid med buss, så kan ikkje bussen få altfor mange roller eller oppgåver samtidig. Viss ei linje skal tilpassast for mange kundebehov samtidig, vil tilbodet til slutt bli lite relevant å bruke for dei fleste.
- Skal bussen køyre innom alle, vil den til slutt bli så langsam at den ikkje blir bra for nokon, fortel Eilertsen.
Omvegar og ringlinjer aukar reisetida for bussen. Når ein no skal legge om ruter frå ringruter til raskare pendelruter, for å få bussen raskare fram, kan det bli litt lengre å gå for nokre. Men ein planlegg slik at flest mogleg skal ha ein busstopp innan fem minutts gangavstand, noko som tilsvarer om lag 400 meter.
Slepp bussen fram
I Bypakken leitar vi etter moglegheiter til å la bussen køyre forbi køen. Slik det er no så går det ikkje fordi bussen deler plass med bilane. Vi har heller ikkje plass til ein metro eller ein superbuss i eigne trasear utan annan trafikk.
Men, no har vi kartlagt kvar flaskehalsane er, strekningar der bussen tapar mykje tid, og vi jobbar for å finne måtar å la bussen kome raskare fram. Det kan vere å bygge eit kollektivfelt på ei viktig strekning eller å gi bussen grønt lys i lyskryssa.
Nye linjekart og gratis buss
22. august 2022 fekk vi også nye linjenummer og nye rutekart. Målet er at det skal vere lett å finne sin buss og at busstilbodet skal vere enkelt og oversiktleg.
Busstilbodet får fire stamlinjer (1-4), lokallinjer (10-14) og regionlinjer.
Tilbodet med gratis buss gjeld frå 22. august til 22. oktober. Det er for at folk skal bli kjent med det nye tilbodet og prøve ut om dei kan skifte frå bil til buss.
Når fleire tek bussen, vert det betre plass på vegen til dei som ikkje kan ta buss.
Kollektivprosjekt i Bypakken
For at bussreisa di skal gå raskare, så bygger bypakken fleire prosjekt, endrar linjer og gjer det enklare for bussen å kome fram. Sjå nokre eksempel under og klikk på kvart punkt, for å få meir informasjon
Bypakken bygger nytt knutepunkt langs Borgundvegen. I dag må bussen ta av frå Borgundvegen for å køyre ei lang sløyfe ned til sjukehuset og opp igjen. I rushtida kan denne sløyfa ta opp til sju-åtte minutt. Med nytt knutepunkt i Borgundvegen treng ikkje bussane å køyre denne ekstra sløyfa og det blir kortare reisetid mellom sentrum og Moa.
Utviklinga av knutepunktet har skjedd i tett samarbeid med sjukehuset. Ved det nye knutepunktet vert det også heis og nye gangvegar som sikrar rask, trygg og brukarvennleg tilkomst direkte til Ålesund sjukehus, som får sin nye hovudinngang mot knutepunktet.
Les meir om kollektivknutepunktet ved Ålesund sjukehus
Bypakken bygger haldeplass for bybussane i Borgundvegen slik at dei slepp å køyre innom terminalen. Den nye haldeplassen vil kutte reisetida med 3-7 minutt.
Les meir om busshaldeplass på Moa
Eit nytt kollektivknutepunkt i Keiser Wilhelms gate og Korsegata sørger for at alle bussane no får same stoppestad i sentrum.
I dag er det mange ulike rutevariantar og haldeplassar i sentrum. Med det nye knutepunktet vert kollektivtrafikken meir effektiv og legg til rette for nye byrom der brukarane av byen får større fokus.
Les meir om kollektivknutepunktet i sentrum
Her skal Bypakken bygge nye haldeplassar langs hovudvegen (E136). Då kan ekspressbussane frå Moa stoppe ved Campus utan å måtte køyre ein omveg for å kome heilt opp til dagens haldeplass.
Les meir om kollektivknutepunkt ved Campus
Her skal Bypakken bygge ein snuplass og legge om linjestrukturen frå ringlinje til pendellinje. Det vil gi opp til ni minutt kortare reisetid fordi bussane vil stå og vente på Slinningsodden i staden for å stå og vente ved Skarbøvika ungdomsskule med passasjerar om bord.
Ringane du ser på kartet under viser fem minutter gangtid, og vi ser at dei fleste som bur her ligg innafor denne gangtida.
Les meir om snuplass på Slinningsodden
Fem lyskryss har fått installert einingar i styreskapa, som ved hjelp av GPS kjenner igjen bussane, gir dei grønt lys og slepp dei raskt fram:
- Hellebrua
- Posthuskrysset/rutebilstasjonen
- Blixvalen (meieriet)
- Hatlasvingen ved Hatlane skole
- Sjukehuset
Terje Aamodt
Les meir om prioritering av buss i lyskryss
Langs innfartsvegen planlegg vi kollektivfelt for at bussen kan køyre forbi køen som gjerne står langs innfartsvegen i rushtida.
Bypakken jobbar med ei løysing for å få etablert eit kollektivfelt på nordsida av hovudvegen (E136) for at bussen kan køyre forbi bilkøen på veg inn til sentrum i rushtida. Prosjektet er under planlegging og ikkje endeleg bestemt.
Terje Aamodt
Du kan også sjå meir om kollektivprosjekt i Bypakken her.